لما تيجي تشتري عقار
لما تقرر انك تشتري عقار “شقة, مكتب, محل, فيلا او شاليه” خلي بالك
من النقط اللي جاية دي:
– اسال كويس عن الشركة المطورة او المقاول المالك : السمعة, الالتزام بمواصفات التشطيب, الالتزام بمعايير البناء و التشطيب, الالتزام بمواعيد التسليم.
– اتاكد من وجود عقد ملكية الأرض والمفروض يكون نهائي و مسجل بالشهر العقاري. وكمان اتاكد من تسلسل الملكية.
– اتاكد من وجود ترخيص بناء حديث و ساري.
– اتاكد من الوحدة داخل حدود ترخيص البناء.
– خلي معاك صورة من عقد الملكية او التخصيص و تسلسل الملكية, وكمان صورة من ترخيص البناء.
– اتاكد من وجود المرافق الأساسية “كهرباء, مياه و غاز” بشكل قانوني.
– لازم البائع يمضي قدامك، ولازم يكون المالك “مالك الارض او صاحب ترخيص البناء”…..(ما تمضيش بتوكيلات).
– اتاكد إن مفيش أي نزاع قانوني علي ملكية أرض المشروع.
– روح الشهر العقاري أو الحي او الجهاز للتاكد من صحة مستندات الملكية والتراخيص.
– لو هتشتري اثناء مراحل البناء او قبل البدء في البناء احرص علي وجود صورة بأبعاد الوحدة متوضح فيها الأبعاد الداخلية وكمان مواصفات التشطيب كجزء من العقد.
– لازم المواصفات الخارجية للعقار والخدمات العامة الخاصة بالعقار تكون مذكورة في العقد.
– توقيعك علي الأقساط بالعقد يعتبر إلزام كافي لسداد الأقساط ، يعني مفيش داعي لتوقيع شيكات او إيصالات إضافية.
– دفع وديعة الصيانة بتكون بعد الاستلام الفعلي للوحدة و بتكون لصالح اتحاد الشاغلين. (يعني متدفعش قبل ما تستلم)
– اتاكد من سلامة توصيلات المياه و شبكة الصرف, وكمان الكهربا علشان ما تكتشفش مفاجآت مش حلوة بعد اتمام عملية البيع.
– اتاكد من المساحة الفعلية للوحدة وإن تكون نسبة الخدمات منطقية ومتناسبة مع المساحات العامة التي تخدم العقار.
– لو هتشتري في كمبوند او قرية سياحية لازم تتحقق من الخدمات العامة “الأمن, النادي, المول, حمامات السباحة, الملاعب و خلافه”
– لازم تتأكد من هوية القائم علي إدارة و صيانة الخدمات العامة المختلفة.
– اتاكد من عدم وجود اي مديونيات سابقة علي المرافق “الكهرباء, المياه و الغاز” (عشان متتدبسش انت فيها)
– خلي معاك توكيل بالتنازل عن كل العدادات والمرافق الخاصة بالوحدة.
بيت زووم # مرشدك العقاري
